ഇന്നലെ രാവിലെ കുമരകം ബോട്ടുജെട്ടി ഓട്ടോറിക്ഷാ സ്റ്റാൻഡിനു സമീപമാണ് അപകടം നടന്നത്. ചീപ്പുങ്കൽ ആശാംപറമ്പിൽ എ.കെ. ബൈജുവി(53) നാണ് പരിക്കേറ്റത്. ബൈജു കുമരകം എസ്എച്ച്എംസിയിലെ ലാബ് ടെക്നീഷനായ മകളെ ഹോസ്പിറ്റലിലെത്തിച്ച് ബൈക്കിൽ മടങ്ങുമ്പോഴായിരുന്നു അപകടം.
കുമരകം ഭാഗത്തുനിന്നു കൈപ്പുഴമുട്ട് ഭാഗത്തേക്കു പോയ പിക്അപ് വാനിന്റെ വശം ബൈജുവിന്റെ ബെെക്കിലുടക്കിയതോടെ നിയന്ത്രണം നഷ്ടപ്പെട്ട് ബൈക്ക് മറിയുകയായിരുന്നു. ഈ സമയം പിക് അപ്പ് വാനിന്റെ ടയർ ബൈജുവിന്റെ കാൽപാദത്തിലൂടെ കയറിയിറങ്ങുകയായിരുന്നു. ഉടൻതന്നെ ജെട്ടിയിലെ ഓട്ടോറിക്ഷ ഡ്രൈവർമാർ സമീപത്തെ എസ്എച്ച്എംസിയിൽ എത്തിച്ചു. പരിശോധനയിൽ മൾട്ടിപ്പിൾ ഫ്രാക്ചർ ഉണ്ടെന്നും പാദത്തിലെ ചർമം വേർപെട്ടതായും കണ്ടെത്തി. അടിയന്തര ശസ്ത്രക്രിയ നടത്തേണ്ടതായതിനാൽ കോട്ടയം മെഡിക്കൽ കോളജിൽ പ്രവേശിപ്പിച്ചു.
അപകടം സൃഷ്ടിച്ച പിക് അപ് വാൻ ഡ്രൈവർ സംഭവസ്ഥലത്തുനിന്ന് വാഹനവുമായി കടന്നു കളഞ്ഞു. സിസിടിവികൾ പരിശോധിച്ച് കുമരകം പോലീസ് അപകടം സൃഷ്ടിച്ച വാഹനവും വൈക്കം സ്വദേശിയായ ഡ്രൈവറെയും കണ്ടെത്തി.
