കൊച്ചി: പുതുവത്സര ആഘോഷങ്ങളുടെ ഭാഗമായി ഫോർട്ട്കൊച്ചിയിൽ രണ്ട് പടുകൂറ്റൻ പപ്പാഞ്ഞികൾ ഉയർന്നു. കൊച്ചിൻ കാർണിവൽ കമ്മിറ്റി ഫോർട്ട്കൊച്ചി പരേഡ് മൈതാനത്തും ഗലാ ഡി. ഫോർട്ട് കൊച്ചി എന്ന സംഘടന ഫോർട്ട്കൊച്ചി വെളി മൈതാനത്തുമാണ് പടുകൂറ്റൻ പപ്പാഞ്ഞിയെ സ്ഥാപിച്ചിട്ടുള്ളത്.

രണ്ട് പപ്പാഞ്ഞികളും 50 അടിയിലേറെ ഉയരമുണ്ട്. കൊച്ചിൻ കാർണിവൽ കമ്മിറ്റി സ്ഥാപിച്ചിരിക്കുന്ന പപ്പാഞ്ഞി തയ്യാറാക്കിയത് വൈറ്റില സ്വദേശിയായ എസ്.എം.അനിൽകുമാറിന്റെ നേതൃത്വത്തിലാണ്. ഒരു മാസത്തിലേറെ സമയമെടുത്താണ് പപ്പാഞ്ഞിയെ തയ്യാറാക്കിയത്. പപ്പാഞ്ഞിയെ സ്ഥാപിക്കുന്നത് കാണാൻ നൂറ് കണക്കിന് ആളുകൾ പരേഡ് ഗ്രൗണ്ടിലെത്തിയിരുന്നു.

ഈ രണ്ട് പപ്പാഞ്ഞികൾക്ക് പുറമെ കൊച്ചിയിൽ ഉടനീളം വിവിധ ക്ലബ്ബുകളുടെ നേതൃത്വത്തി നൂറ് കണക്കിന് പപ്പാഞ്ഞികളെ വഴിയരികിൽ ഒരുക്കിയിട്ടുണ്ട്. ഇന്ന് രാത്രി 12 മണിയോടെ പപ്പാഞ്ഞികളെല്ലാം അഗ്നിക്കിരയാകും. പുതുവത്സരാഘോഷം ഏറെ ആഘോഷിക്കപ്പെടുന്ന ഫോർട്ട്കൊച്ചിയിലേക്ക് ഇന്ന് ഉച്ചയോടെ തിരക്ക് ആരംഭിക്കും. കർശനമായ പോലീസ് നിയന്ത്രണത്തിലാകും കാർണിവൽ ചടങ്ങുകൾ നടക്കുക.

