കൂത്താട്ടുകുളം: എം.സി. റോഡിൽ ബാപ്പുജി സ്കൂളിന് സമീപം ലോറിയുടെ നിയന്ത്രണം നഷ്ടപ്പെട്ട് ബൈക്കിൽ ഇടിച്ച് ബൈക്ക് യാത്രികൻ മരിച്ചു. മല്ലപ്പള്ളി പുത്തൻവീട്ടിൽ ബിലു പി. ജോൺ (25) ആണ് മരിച്ചത്. ഇന്നലെ രാവിലെ 7.15നായിരുന്നു അപകടം.
കൂത്താട്ടുകുളം ഭാഗത്ത് നിന്നും കോട്ടയം ഭാഗത്തേക്ക് പോവുകയായിരുന്ന ഇരുമ്പ് കമ്പി കയറ്റി വന്ന ലോറിയുടെ നിയന്ത്രണം നഷ്ടപ്പെട്ടാണ് അപകടം സംഭവിച്ചത്. എതിർ ദിശയിൽ നിന്ന് എത്തിയ ബൈക്ക് ഇടിച്ചുതെറിപ്പിച്ച ശേഷം ലോറി സമീപത്തെ വീട്ടുമുറ്റത്തേക്ക് ഇടിച്ചു കയറി തൊട്ടടുത്തുള്ള വ്യാപാര സ്ഥാപനത്തിന്റെ ഭിത്തിയിൽ ഇടിച്ച് നിൽക്കുകയായിരുന്നു. ലോറിഡ്രൈവർ തമിഴ്നാട് സ്വദേശി മുസിരുവട്ടം തിരിച്ചിമാവെട്ടം കാർത്തിക്കി(32)നും പരിക്കേറ്റു.
അതിവേഗത്തിൽ എത്തിയ ലോറി ബൈക്കിൽ ഇടിച്ച ശേഷം വീട്ടുമുറ്റത്തെ തെങ്ങ് ഉൾപ്പെടെയുള്ള മരങ്ങൾ പിഴുതാണ് മുന്നോട്ടുപാഞ്ഞത്. ഇടിയുടെ ആഘാതത്തിൽ വ്യാപാരസ്ഥാപനം പ്രവർത്തിക്കുന്ന കെട്ടിടത്തിനും കേടുപാടുകൾ സംഭവിച്ചിട്ടുണ്ട്. പരിക്കേറ്റ ഡ്രൈവറെ കൂത്താട്ടുകുളം ദേവമാതാ ആശുപത്രിയിൽ പ്രവേശിപ്പിച്ചു. ഒപ്പം ഉണ്ടായിരുന്ന ക്ലീനർ പരിക്കില്ലാതെ രക്ഷപ്പെട്ടു. കൂത്താട്ടുകുളം ഫയർഫോഴ്സിന്റെയും പോലീസിന്റെയും നേതൃത്വത്തിലാണ് രക്ഷാപ്രവർത്തനങ്ങൾ നടന്നത്. ഡ്രൈവർ ഉറങ്ങിപ്പോയതാണ് അപകടകാരണമായി പറയപ്പെടുന്നത്.
ബിലുവിന്റെ മൃതദേഹം മൂവാറ്റുപുഴ താലൂക്ക് ആശുപത്രിയിൽ പോസ്റ്റ്മോർട്ടത്തിനു ശേഷം മല്ലപ്പള്ളി ജിഎംഎം ആശുപത്രിയിൽ സൂക്ഷിച്ചിരിക്കുകയാണ്. സംസ്കാരം ഇന്ന് വൈകുന്നേരം 3.30ന് മല്ലപ്പള്ളി സെന്റ് ഫ്രാൻസീസ് മലങ്കര സുറിയാനി കത്തോലിക്ക പള്ളിയിൽ നടക്കും.
