തൃപ്പൂണിത്തുറ: പുതുവർഷം പുലരാൻ മിനിട്ടുകൾ ബാക്കിനിൽക്കെ, തൃപ്പൂണിത്തുറ ചാത്താരിയിലെ ഫ്ലാറ്റ് സമുച്ചയത്തിൽ യുവാക്കളുടെ കൂട്ടത്തല്ല്. ചാത്താരി വൈമീതി റോഡിലുള്ള സ്റ്റാർ അപ്പാർട്ട്മെന്റിലാണ് യുവാക്കൾ രണ്ട് ചേരിയായി ഏറ്റുമുട്ടിയത്. സംഘർഷത്തിൽ അഞ്ച് പേർക്ക് പരിക്കേറ്റു. മൂന്ന് പേരെ എറണാകുളം ജനറലാശുപത്രിയിലും രണ്ടു പേരെ താലൂക്കാശുപത്രിയിലും പ്രവേശിപ്പിച്ചു. ഫ്ലാറ്റിലെ ഒരു സംഘം യുവാക്കൾക്കൊപ്പമുണ്ടായിരുന്ന പെൺകുട്ടിയെ രണ്ടു ദിവസം മുമ്പ് മറുവിഭാഗത്തെ യുവാക്കൾ തുറിച്ചു നോക്കിയെന്നതിനെച്ചൊല്ലിയുള്ള തർക്കമാണ് സംഘർഷത്തിൽ കലാശിച്ചത്.
അസോസിയേഷൻ ഭാരവാഹികളറിയിച്ചതി പ്രകാരം പോലീസെത്തിയതിനാലാണ് കൂടുതൽ പ്രശ്നങ്ങൾ ഒഴിവായത്. കഴിഞ്ഞ ദിവസവും ഇരു വിഭാഗം യുവാക്കൾ തമ്മിൽ ഇതേ വിഷയത്തിൽ വാക്കുതർക്കം നടന്നിരുന്നു. ആക്രമണം നടത്തിയവർക്കെതിരെ ശക്തമായ നിയമനടപടി സ്വീകരിക്കണമെന്നാവശ്യപ്പെട്ട് അസോസിയേഷൻ ഭാരവാഹികൾ പോലീസിനെ സമീപിച്ചിട്ടുണ്ട്. അതേ സമയം തുറിച്ചുനോട്ടത്തെ ച്ചൊല്ലിയുള്ള തല്ലിന് പിന്നാലെ ഇതേ സമുച്ചയത്തിൽ വാഹനങ്ങൾ പാർക്ക് ചെയ്യുന്നതുമായി ബന്ധപ്പെട്ടും യുവാക്കൾക്കിടയിൽ തർക്കവും കൈയാങ്കളിയുമുണ്ടായെങ്കിലും മുതിർന്നവരിടപെട്ട് പിടിച്ചു മാറ്റുകയായിരുന്നു.
