ഉത്തർപ്രദേശിലെ ലഖ്നൗവിൽ ഡിഫൻസ് എക്സ്പോ ഗ്രൗണ്ടിൽ നടക്കുന്ന സ്കൗട്ട് ആൻഡ് ഗൈഡ്സിന്റെ ഗ്രാൻഡ് ഫിനാലെ ഡയമണ്ട് ജൂബിലിയിൽ പങ്കെടുക്കാൻ കോതമംഗലം സെന്റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിലെ എട്ട് വിദ്യാർഥിനികൾക്ക് അവസരം ലഭിച്ചു. 23 മുതൽ 29 വരെ നടക്കുന്ന ഡയമണ്ട് ജൂബിലിയിൽ കേരളത്തിൽനിന്ന് 160 ഗൈഡുകളും 200 സ്കൗട്ടുകളും ഉൾപ്പെടെ 430 പേരാണ് പങ്കെടുക്കുന്നത്.
സെന്റ് അഗസ്റ്റിൻ ഗേൾസ് ഹയർ സെക്കൻഡറി സ്കൂളിലെ ഭാമ മണിക്കുട്ടൻ, അദിത വിനോദ്, ആൻ മരിയ എൽദോസ്, സാന്ദ്ര സന്തോഷ്, ആരതി എം. നമ്പ്യാർ, ആൻ മരിയ ഷാജി, നിവേദ്യ പ്രവീൺ, അനിറ്റ് മരിയ ദേവസി എന്നിവരാണ് ജില്ലയെ പ്രതിനിധീകരിച്ച് ടീമിലുള്ള ഗൈഡുകൾ.
ഗൈഡ് ക്യാപ്റ്റൻ ഇതേ സ്കൂളിലെ അധ്യാപിക സരിത കെ. വർഗീസ് സംഘത്തോടൊപ്പം ഉണ്ട്. ലഖ്നൗവിൽ ഫിനാലെയിൽ നടക്കുന്ന ഫാഷൻ ഷോയിൽ കേരളത്തെ പ്രതിനിധീകരിക്കുന്നത് സെന്റ് അഗസ്റ്റിൻസിലെ നിവേദ്യ പ്രവീൺ ആണ്. കൂടാതെ പേജന്റ് ഷോ, ക്യാമ്പ് ക്രാഫ്റ്റ് തുടങ്ങി വിവിധ ഇനങ്ങളിലും കുട്ടികൾ പങ്കെടുക്കും.
ചടങ്ങിന്റെ ഉദ്ഘാടനം പ്രധാനമന്ത്രി നരേന്ദ്രമോദിയും, സമാപന സമ്മേളനത്തിന്റെ ഉദ്ഘാടനം രാഷ്ട്രപതി ദ്രൗപതി മുർമുവും നിർവഹിക്കും. രാജ്യത്തെ വിവിധ സംസ്ഥാനങ്ങളിൽനിന്നും വിദേശരാജ്യങ്ങളിൽ നിന്നുമായി 30,000 പേർ ഡയമണ്ട് ജൂബിലി ചടങ്ങിൽ പങ്കെടുക്കുന്നുണ്ട്.
