ഇരുമ്പനം: കിണറ്റിൽ കാൽവഴുതി വീണ വയോധികനെ അഗ്നിരക്ഷാസേന രക്ഷപ്പെടുത്തി. ഇരുമ്പനം 6-ാം വാർഡിൽ ശ്രീരാഗം വീട്ടിൽ കണ്ഠീശ്വരൻ (82) നെയാണ് തൃപ്പൂണിത്തുറ ഫയർ സ്റ്റേഷൻ എസ്എഫ്ആർഒ കൃഷ്ണകുമാറിന്റെ നേതൃത്വത്തിലുള്ള സംഘം രക്ഷപ്പെടുത്തിയത്.
പണി നടന്നുകൊണ്ടിരുന്നതിനാൽ മേൽമൂടി മാറ്റിയിട്ടിരുന്ന 50 അടി താഴ്ച്ചയുള്ള കിണറ്റിലേക്ക് അബദ്ധത്തിൽ വീട്ടുകാരൻ വീഴുകയായിരുന്നു. തിങ്കളാഴ്ച്ച ഉച്ചയ്ക്ക് 12 ഓടെയായിരുന്നു സംഭവം.
വിവരമെത്തിയയുടനെ രക്ഷാസേന സ്ഥലത്തെത്തുകയായിരുന്നു. തുടർന്ന് ഫയർ ഉദ്യോഗസ്ഥനായ വിഷ്ണു റോപ്പ് ഉപയോഗിച്ച് കിണറ്റിലേക്കിറങ്ങി കസേരയിൽ വയോധികനെ കയറ്റിയിരുത്തിയ ശേഷം മറ്റ് ഉദ്യോഗസ്ഥർ ചേർന്ന് സുരക്ഷിതമായി റോപ്പ് വലിച്ചുയർത്തി പുറത്തെത്തിക്കുകയായിരുന്നു. അഗ്നിരക്ഷാ ഉദ്യോഗസ്ഥരായ സുനിൽകുമാർ, സിൻമോൻ, ഹോംഗാർഡ് ബാബു തുടങ്ങിയവർ രക്ഷാപ്രവർത്തനത്തിൽ പങ്കെടുത്തു.
