കൊച്ചി: തൃശൂര് റെയില്വേ പാര്ക്കിംഗ് മേഖലയില് വന്തീപിടുത്തമുണ്ടായി വാഹനങ്ങള് കത്തിനശിക്കാന് ഇടയായ സംഭവത്തിന്റെ പശ്ചാത്തലത്തില് എറണാകുളത്തെ റെയില്വേ സ്റ്റേഷന് പാര്ക്കിംഗ് മേഖലയില് പോലീസ് പരിശോധന നടത്തി. എറണാകുളം നോര്ത്ത്, സൗത്ത് സ്റ്റേഷനുകളിലെ പാര്ക്കിംഗ് സ്ഥലങ്ങളിലാണ് ടൗണ്, സൗത്ത് പോലീസ് ഉദ്യോഗസ്ഥരെത്തി പരിശോധിച്ചത്. നോര്ത്ത് സ്റ്റേഷനിലെ താത്കാലിക പാര്ക്കിംഗ് ഏരിയയോട് ചേര്ന്ന് റെയില്വേയുടെ ഹോട്ടലിന്റെ അടുക്കള പ്രവര്ത്തിക്കുന്നതിനാല് തീപിടുത്ത സാധ്യത ഉണ്ടെന്ന് പോലീസ് വിലയിരുത്തി. അടുക്കളയിലെ ഗ്യാസ് സിലിണ്ടറുകള് വച്ചിരിക്കുന്നത് പാര്ക്കിംഗ് മേഖലയോട് ചേര്ന്നാണ്.
നൂറുകണക്കിന് ബൈക്കുകള് ദിവസേന പാര്ക്ക് ചെയുന്ന മേഖലയാണിത്. തീപടര്ന്നാല് രക്ഷാപ്രവര്ത്തനം ദുര്ഘടമായിരിക്കുമെന്നും പോലീസ് വിലയിരുത്തി. അപകട സാധ്യത മുന്നില് കണ്ട് അടുക്കള മാറ്റി സ്ഥാപിക്കാനും നിര്ദേശം നല്കി. ഇന്ന് റെയില്വേയുടെ ആര്പിഎഫ് സംഘവും പാര്ക്കിംഗ് മേഖലകളില് പ്രത്യേക പരിശോധന നടത്തുന്നുണ്ട്. സുരക്ഷിതമായ സാഹചര്യത്തിലാണോ വാഹനങ്ങള് പാര്ക്ക് ചെയ്തിരിക്കുന്നത്, അടിയന്തിര ഘട്ടമുണ്ടായാല് രക്ഷാപ്രവര്ത്തനത്തിന് സൗകര്യമുണ്ടോ തുടങ്ങിയ കാര്യങ്ങള് വിലയിരുത്തും. സ്വകാര്യ വ്യക്തികള്ക്ക് കരാര് കൊടുത്താണ് റെയില്വേയുടെ പാര്ക്കിംഗ് നടത്തുന്നത്.
