പെരുമ്പാവൂര്: ഇതര സംസ്ഥാനങ്ങളില് നിന്ന് പ്രായപൂര്ത്തിയാകാത്ത കുട്ടികളെ കേരളത്തിലെത്തിച്ച് പ്ലൈവുഡ് ഫാക്ടറികളില് ക്രൂരമായ ബാലവേലയ്ക്ക് ഇരയാക്കുന്ന വന് റാക്കറ്റ് പെരുമ്പാവൂരില് സജീവം. വെറും 10 വയസ്സ് മാത്രം പ്രായമുള്ള കുട്ടികളെ പോലും പ്രതിദിനം 10 മുതല് 12 മണിക്കൂര് വരെ കഠിന ജോലിക്ക് നിയോഗിക്കുന്നതായാണ് പോലീസും ചൈല്ഡ് ലൈന് പ്രവര്ത്തകരും കണ്ടെത്തിയത്. കുട്ടികള്ക്ക് മണിക്കൂറിന് വെറും 50 രൂപ മാത്രമാണ് പ്രതിഫലമായി നല്കുന്നത്.
ശ്വാസംമുട്ടിക്കുന്ന അന്തരീക്ഷത്തിലും പൊടിയും രാസവസ്തുക്കളും നിറഞ്ഞ ഫാക്ടറികളിലും മതിയായ സുരക്ഷാ സംവിധാനങ്ങളില്ലാതെയാണ് ഇവരെ ജോലി ചെയ്യിപ്പിക്കുന്നത്. മാസ്ക് പോലും നല്കാതെയാണ് കുട്ടികളെ ജോലിക്കിറക്കുന്നതെന്നും ഇത് അവരുടെ ആരോഗ്യത്തെ ഗുരുതരമായി ബാധിക്കുന്നുണ്ടെന്നും അധികൃതര് വ്യക്തമാക്കി.
കഴിഞ്ഞ ഞായറാഴ്ച പെരുമ്പാവൂരിലെ ഒരു പ്ലൈവുഡ് ഫാക്ടറിയില് നടത്തിയ പരിശോധനയില് ഒന്പത് കുട്ടികളെ പോലീസ് മോചിപ്പിച്ചിരുന്നു. ഉത്തരേന്ത്യന് സംസ്ഥാനങ്ങളില് നിന്ന് അതിഥി തൊഴിലാളികളുടെ സഹായത്തോടെയാണ് കുട്ടികളെ കേരളത്തിലെത്തിക്കുന്നതെങ്കിലും, ഇതിന് പിന്നില് പ്രവര്ത്തിക്കുന്നത് മലയാളി ഏജന്റുമാരാണെന്നാണ് പോലീസിന്റെ കണ്ടെത്തല്.
പിടിയിലായ കുട്ടികളെ പെരുമ്പാവൂരിലെത്തിച്ചതിന് പിന്നില് തദ്ദേശവാസിയായ തോമസ് എന്ന ഏജന്റാണെന്ന നിര്ണായക വിവരം പോലീസിന് ലഭിച്ചിട്ടുണ്ട്. ഇയാളെ കണ്ടെത്താനുള്ള അന്വേഷണം ഊര്ജിതമാക്കിയിട്ടുണ്ട്. പാവപ്പെട്ട കുടുംബങ്ങളിലെ കുട്ടികളെ കുറഞ്ഞ വേതനത്തില് കൂടുതല് സമയം ജോലി ചെയ്യിക്കാന് കഴിയുമെന്നതാണ് ഇത്തരം റാക്കറ്റുകള്ക്ക് പ്രേരണയാകുന്നതെന്ന് അന്വേഷണ സംഘം ചൂണ്ടിക്കാട്ടുന്നു.
മോചിപ്പിച്ച കുട്ടികളെ ചൈല്ഡ് വെല്ഫെയര് കമ്മിറ്റിക്ക് മുന്നില് ഹാജരാക്കി സുരക്ഷിത കേന്ദ്രങ്ങളിലേക്ക് മാറ്റി. വരും ദിവസങ്ങളില് പെരുമ്പാവൂരിലെയും സമീപപ്രദേശങ്ങളിലെയും പ്ലൈവുഡ് ഫാക്ടറികളിലും മറ്റ് വ്യവസായ സ്ഥാപനങ്ങളിലും പോലീസും തൊഴില് വകുപ്പും സംയുക്തമായി വ്യാപക പരിശോധന നടത്തുമെന്ന് അധികൃതര് അറിയിച്ചു.
